Scholastic англи хэлний цахим номын санг ашиглан уншиж буй сурагчдад зөвлөн туслах, туршлага хуваалцах зорилготой нөхөрсөг уулзалтыг нэгдүгээр сарын 27-ны өдөр зохион байгууллаа.

Уулзалтад Нийслэлийн Ерөнхий боловсролын Хөгжил дунд сургуулийн сурагчид оролцож, Scholastic платформ дээр англи хэлний цахим ном унших явцад тулгарч буй асуудал, асуултуудаа хэлэлцэн, зөвлөгөө мэдээлэл авсан юм. Мөн цахим номыг илүү үр дүнтэй ашиглах, унших дадлыг тогтмол хэвшүүлэх, ойлгож унших арга барилын талаар туршлага хуваалцлаа.

Хөгжил дунд сургууль нь нийслэлийн хэмжээнд Scholastic уншлагын платформыг идэвхтэй ашиглаж, цахим ном уншиж буй сурагчдынхаа тоогоор тэргүүлж буй сургуулиудын нэг юм.

Англи хэл сурах хамгийн үр дүнтэй арга бол тогтмол унших дадал бөгөөд сурагчдад унших орчныг зөв, саадгүй бүрдүүлэх нь боловсролын байгууллагуудын чухал зорилгын нэг билээ. Scholastic цахим номын сан нь сурагчдад дэлхийн шилдэг хүүхдийн зохиол, танин мэдэхүйн бүтээлүүдийг унших боломжийг олгож, хэлний чадвараа бодитоор хөгжүүлэх нөхцөлийг бүрдүүлдэг.

Ирээдүй хойч үе маань дэлхийтэй англи хэлээр чөлөөтэй харилцах суурь нь ийм төрлийн уншлагын соёл, суралцах орчноос эхэлдэг. Иймээс боловсролын байгууллагууд хамтран сурагчдын унших дадлыг дэмжих, илүү хүртээмжтэй, ухаалаг боловсролын орчныг бүрдүүлэхэд анхаарч ажиллаж байна.