Монгол Улсад Pearson англи хэлний сургалтын цогц хөтөлбөрийг туршилтын журмаар нэг жилийн хугацаанд хэрэгжүүлсний үр дүнд үндэсний хэмжээнд нэвтрүүлж, өдгөө хоёр дахь жилдээ амжилттай хэрэгжиж байна. Энэхүү хөтөлбөр нь сурагчдын англи хэлний мэдлэг, чадварыг олон улсын жишигт нийцүүлэн хөгжүүлэх зорилготой бөгөөд сургалтын үр дүнг олон улсын шалгалтаар баталгаажуулах боломжийг бүрдүүлж байгаа юм.
Үүнтэй холбогдуулан олон улсад хүлээн зөвшөөрөгдсөн Pearson англи хэлний шалгалт болох PTE Academic-ийг Монгол Улсын Элсэлтийн ерөнхий шалгалтын (ЭЕШ) англи хэлний оноотой дүйцүүлэх шийдвэрийг 2024 онд гаргасан. Ингэснээр сурагчид ерөнхий боловсролын сургуулийн III ангиас эхлэн XII анги хүртэл Pearson англи хэлний хөтөлбөрөөр суралцаж, төгсөх жилдээ уг хөтөлбөртэй уялдсан олон улсын шалгалт болох PTE Academic шалгалтыг өгөх боломжтой болсон юм.
- – PTE Аcademic шалгалт нь IELTS болон TOFEL-ийн оноотой адил англи хэлний олон улсын түгээмэл шалгалтын нэг юм.
- – Тус шалгалтын оноотой суралцагч олон улсын оюутан хүлээн авдаг 4000 гаруй их, дээд сургууль элсэн суралцах боломжтой.
- Өнөөдрийн байдлаар дэлхий даяар жилд 1 сая гаруй суралцагч PTE Academic шалгалтыг өгч байна.
- PTE – Academic шалгалт нь CEFR буюу Европын холбооны гадаад хэлний нийтлэг стандартад нийцдэг.
- – Австрали болон Шинэ Зеланд улсын бүх их, дээд сургуулиуд хүлээн зөвшөөрөгддөг бөгөөд цагаачлах, ажил хөдөлмөр эрхлэх зэрэг визний бүх зорилгоор хүлээн авдаг. Мөн Австралийн тэтгэлэгт хамрагдах боломжтой.
- – Их Британи улсын хувьд Кембрижийн их сургуулиас бусад бүх их дээд сургуулиуд хүлээн зөвшөөрдөг. Их Британийн Засгийн газраас оюутны виз болон чадварлаг ажилчдын виз олгох UKVI Secure English test гэж хүлээн зөвшөөрсөн. Мөн PTE Academic шалгалтыг өгснөөр Chevening тэтгэлэгт хамрагдах боломжтой.
- – Канад улсын их, дээд сургуулийн 95 хувь нь PTE academic шалгалтын оноог хүлээн зөвшөөрсөн төдийгүй SDS визний өргөдөлд тус шалгалтын оноог хүлээн зөвшөөрдөг. 2024 оноос эхлэн ажиллах хүчний визний өргөдөлд PTE academic шалгалтын оноог хүлээн зөвшөөрсөн.
- – АНУ-ын Ivy League Schools – Yale, Harvard. Princeton, Cornell зэрэг 1000 гаруй их, дээд сургууль PTE academic шалгалтын оноог хүлээн зөвшөөрдөг. Түүнчлэн тус шалгалтын оноотой сурагчид Fulbright тэтгэлэгт хамрагдах боломжтой.
- – Европын улс орнуудын хувьд Финлянд, Норвеги, Швед, Ирландын бүх их, дээд сургуулиуд PTE academic шалгалтын оноог хүлээн зөвшөөрдөг төдийгүй европын холбооны бусад улс орнуудын 100 орчим их, дээд сургууль, бизнесийн сургуулиуд хүлээн зөвшөөрдөг.
- – Ази тивийн хувьд Малайз улсын бүх их, дээд сургууль, Хонгконгийн 9 их, дээд сургууль, Японы олон улсын их, дээд сургуулиуд болон Сингапурын томоохон их, дээд сургуулиуд PTE Academic шалгалтын оноог хүлээн зөвшөөрдөг.
PTE Academic шалгалт нь дэлхийн олон улс орны их, дээд сургуулиуд болон байгууллагууд хүлээн зөвшөөрдөг олон улсын стандартад нийцсэн шалгалт бөгөөд орчин үеийн дижитал технологид суурилсан гэдгээрээ онцлог. Тус шалгалтын ярих, бичих, унших, сонсох чадварыг хиймэл оюунд суурилсан систем үнэлдэг тул дүн нь бодитой, ил тод гардаг. Мөн шалгалтын дүн ихэвчлэн 24–48 цагийн дотор гардаг нь шалгуулагчдад цаг хугацааны хувьд давуу тал болдог.
Ийнхүү PTE Academic шалгалтын оноог ЭЕШ-ын оноотой дүйцүүлэн тооцох боломж бүрдсэнээр Монголын сурагчид олон улсын шалгалтыг өгөх, цаашлаад гадаадын их, дээд сургуульд суралцах боломжоо нэмэгдүүлэх давхар боломжтой болж байна.
