Pearson англи хэлний сургалтын цогц хөтөлбөр хэрэгжиж эхэлснээр Архангай аймгийн ерөнхий боловсролын сургуулиуд англи хэлний хичээлээ цахим платформ болон цаасан суурьтай сурах бичгийг хослуулан зохион байгуулах идэвх нэмэгдэж, сургалтын арга зүй, сурагчдын оролцоонд эерэг өөрчлөлт гарч байгааг орон нутгийн багш нар онцолж байлаа.

Мөн интернэтийн хүртээмж, хурд, багтаамж нь орон нутгийн сургуулиудын хувьд тулгамдсан асуудал байгааг онцолж, аймгийн хэмжээнд интернэтийн багтаамжийг сайжруулах саналыг Боловсролын ерөнхий газарт уламжилав. Үүнээс гадна Архангай аймагт ажиллаж буй гадаад хэлний багш нарыг жилд хоёр удаа Pearson англи хэлний сургалтын цогц хөтөлбөрөөр мэргэжил, ур чадвар дээшлүүлэх сургалтад хамруулах хүсэлтийг IEDC–Pearson partner Mongolia багийн хамт олонд хүргүүллээ.

Pearson англи хэлний сургалтын цогц хөтөлбөрийн хүрээнд Монгол Улсын бүх аймгийн ерөнхий боловсролын сургуулийн удирдлага, багш, сурагчдад чиглэсэн зөвлөн туслах үйлчилгээ бүрэн хэрэгжиж, орон нутгийн боловсролын салбарт бодит дэмжлэг үзүүлж байна.

Тус хөтөлбөр нь хэвлэмэл сурах бичиг, дасгал ажлын номноос гадна “Pearson English Connect”/PEC/ гэсэн платформтой.

Дижитал платформ нь хамгийн сүүлийн үеийн технологийг ашигласан, хиймэл оюунд суурилсан багш, сурагчдад зориулсан бүрэн интерактив хэрэглэгдэхүүнтэй.

Энэхүү платформд багшид зориулан боловсруулсан суралцахуй зорилт бүхий гарын авлага, хичээлийн төлөвлөгөө, үнэлгээний цогц багц, онлайн анги, дүрмийн хичээл, интерактив сурах бичгийг ашиглах видео заавар, тест зохиогч, дүнгийн систем / сурагч бүрээр/, зайнаас заах гарын авлага, тусламж, заавар зэрэг хэрэглэгдэхүүн бий.

Өөрөөр хэлбэл, багш дижитал платформоо ашиглан хичээлээ удирдан явуулна, харин сурагчид багшийг дагаан хэвлэмэл сурах бичигтэйгээ зэрэг ажиллаад явах боломжтой юм.