Монгол Улсын хэмжээнд мэргэжлийн болон техникийн боловсролын салбарын Программчлалын II олимпиад дөрөвдүгээр сарын 17-ны өдөр амжилттай зохион байгуулагдлаа. Энэ удаагийн олимпиадын онцлог нь орон нутгийн политехникийн суралцагчид мэдлэг, ур чадвараараа манлайлж, шилдэг байр эзэлсэн явдал байв. Тэд ийнхүү улсын түвшинд өрсөлдөх бүрэн чадамжтайгаа бодитоор харууллаа.

Мөн тус олимпиадад Pearson BTEC International Level 3 хөтөлбөр хэрэгждэггүй политехникийн коллежийн суралцагчид оролцсон нь онцлох үйл явдал болсон юм. Энэ нь мэргэжлийн боловсролын салбарт чадварлаг, өрсөлдөхүйц залуус өргөн хүрээнд бэлтгэгдэж байгааг илтгэж байна.

Шагналт байрын эзэд:

• Тэргүүн байр — Н.Батцэцэг | Өвөрхангай аймаг дахь Политехник коллеж
• Дэд байр — Д.Сарангуа | Увс аймгийн Улаангом Политехник коллеж
• Гуравдугаар байр — Ц.Лхагвадорж | Өвөрхангай аймаг дахь Политехник коллеж
• Тусгай байр — Ц.Энх-Үжин | Үйлдвэрлэл, урлалын Политехник коллеж
• Тусгай байр — О.Ануужин | Өвөрхангай аймаг дахь Политехник коллеж

Шагналт байрт шалгарсан оролцогчдод Pearson BTEC International Level 3 хөтөлбөрийг Монгол Улсад нэвтрүүлэгч Ай И Ди Си ХХК-ийн зүгээс олон улсад хүлээн зөвшөөрөгдсөн PEIC шалгалт өгөх эрх олголоо. Ингэснээр тэд мэдлэг, чадвараа дараагийн шатанд үнэлүүлж, олон улсын түвшинд баталгаажуулах боломжтой болж байна.

Энэхүү олимпиад нь Монгол Улсад төрийн өмчийн 6, төрийн бус өмчийн 1, нийт 7 политехник коллежид Pearson-ийн BTEC International Level 3 хөтөлбөр амжилттай хэрэгжиж буйн тод жишээ болж байна.

Тус хөтөлбөр нь суралцагчдыг:

• олон улсын стандартад нийцсэн ур чадвартай болгох,
• гадаад, дотоодын их, дээд сургуульд үргэлжлүүлэн суралцах боломжийг нэмэгдүүлэх,
• хөдөлмөрийн зах зээлд бэлтгэгдсэн мэргэжилтэн болгон төлөвшүүлэхэд чиглэдэг.

Ийнхүү политехникийн суралцагчид зөвхөн мэргэжлийн боловсрол эзэмшээд зогсохгүй, олон улсын түвшинд өрсөлдөх ур чадвар, боломжийг бодитоор бүрдүүлж буйгаа энэхүү олимпиадаар дахин батлан харууллаа.