Ерөнхий сайд Н.Учрал үндэсний хэмжээнд хэрэгжиж буй Pearson хөтөлбөртэй танилцлаа -

Ерөнхий сайд Н.Учрал Pearson англи хэлний
сургалтын цогц хөтөлбөртэй танилцлаа

Монгол Улсын Ерөнхий сайд Н.Учрал “Мэдлэгийн хоцрогдлоос монгол хүүхэд бүрийг чөлөөлье” санаачилгын хүрээнд нийслэлийн ерөнхий боловсролын 2 дугаар сургууль дээр ажиллалаа.

Энэ үеэр Ай И Ди Си байгууллагын зүгээс үндэсний хэмжээнд хэрэгжүүлж буй Pearson англи хэлний сургалтын цогц хөтөлбөрийг танилцуулсан юм. Тус хөтөлбөр нь сурах бичиг, дасгал ажлын дэвтэр, багшийн гарын авлагаас гадна pearson english connect хиймэл оюунд суурилсан дижитал платформыг багтааснаараа онцлог. Энэ нь сурагч бүрийн түвшинд тохирсон даалгавар, ахицын хяналт, үнэлгээг автоматжуулснаар мэдлэгийн хоцрогдлыг эрт илрүүлж, нөхөх боломжийг бүрдүүлдэг.

Өөрөөр хэлбэл, Pearson хөтөлбөр нь:

– Сурагч бүрийн суралцах хурд, түвшинд нийцсэн бие даан суралцах ур чадварыг хөгжүүлэх;
– Багшид сурагчдын ахицыг бодитоор харж, зорилтот дэмжлэг үзүүлэх боломж олгох;
Хиймэл оюун (AI) оюун ашиглан үнэлгээг илүү оновчтой болгож, багшийн чанарт төвлөрөх цагийг нэмэгдүүлэх зэрэг давуу талаараа “мэдлэгийн хоцрогдол”-ыг системтэй бууруулах үр дүнтэй шийдэл юм.

Өнөөдрийн байдлаар Pearson хөтөлбөрийг дэлхийн 200 гаруй улсад хэрэгжүүлж байгаа бөгөөд Монгол Улсад энэ хичээлийн жилээс эхлэн III–VIII ангид үндсэн журмаар, IX–XII ангид туршилтаар нэвтрүүлээд байна.

Ийнхүү олон улсын жишигт нийцсэн агуулга, дижитал технологид суурилсан шийдлийг боловсролын системд нэвтрүүлснээр сурагч бүрийн суралцах боломжийг тэлж, мэдлэгийн хоцрогдлыг бууруулахад бодит үр дүн авчирна.