Сурагчдын III улирлын амралтыг тохиолдуулан Ай И Ди Си байгууллагаас нийслэлийн таван дүүргийн 241 англи хэлний багшид зориулсан Pearson English Connect (PEC) дижитал платформын сургалтыг 2026 оны 4 дүгээр сарын 02–09-ний өдрүүдэд зохион байгууллаа.

Тус сургалт нь PEC платформын хэрэглээний мэдлэгийг баталгаажуулах, мөн Pearson англи хэлний хөтөлбөрөөр хичээл зааж эхэлж буй шинэ багш нарт нэгдсэн, цэгцтэй ойлголт өгөхөд чиглэсэн юм.

Сургалтад:

• – СХД-ийн 30 сургуулийн 51 багш
• – БЗД-ийн 22 сургуулийн 61 багш
• – СБД-ийн 19 сургуулийн 44 багш
• – ХУД-ийн 13 сургуулийн 34 багш танхимаар оролцсон бол ЭЕШ-ийн урьдчилсан сорилго эхэлсэнтэй холбоотойгоор БГД-ийн 51 багш цахимаар хамрагдлаа.

Сургалтын үеэр багш нарт:

• – III–IV ангид ашиглаж буй Rise and Shine, V–VIII ангид ашиглаж буй Wider World сурах бичгийн агуулга, онцлог
• – PEC платформын үндсэн ойлголт, хэрэглээ
• – Цахим анги үүсгэх, гэрийн даалгаврыг цахимаар өгөх аргачлал
• – Үнэлгээ, шалгалтын бүтэц
• – Сурагчдын гүйцэтгэлд тулгуурлан ялгаатай хэрэгцээтэй сурагч бүртэй ажиллах боломж
• – Хичээлийн жилийн эхэн, явц, төгсгөлд авах шаардлагатай үнэлгээ, шалгалтуудын талаарх нэгдсэн мэдээллийг өглөө.

Мөн багш нар танхим болон цахим сургалтыг хослуулан хэрэгжүүлэхэд тулгарч буй асуудлаа хэлэлцэж, сургууль, багшийн сайн туршлагаа харилцан хуваалцсан нь сургалтын онцлог байв.

Өнөөдөр улсын хэмжээнд төрийн болон орон нутгийн өмчит ерөнхий боловсролын сургуулийн англи хэлний багш нар дэлхийн 200 гаруй орны сурагчдын ашиглаж буй Pearson англи хэлний сургалтын цогц хөтөлбөрөөр хоёр дахь жилдээ хичээл сургалтын үйл ажиллагаагаа явуулж байна.

Энэхүү хөтөлбөр нь сурагчдыг III ангиас нь эхлэн олон улсын шалгалтад үе шаттай бэлтгэх боломжийг бүрдүүлж байгаа бол багш нарын хувьд олон улсын шалгалтын эрхтэй багш болох, танхим болон цахим сургалтын арга зүйгээ хөгжүүлэх, дижитал ур чадвараа ахиулах боломжийг нээж байна.

Мөн сурагчид ерөнхий боловсролын сургуулийн англи хэлний мэдлэг дээрээ тулгуурлан олон улсын шалгалт өгөх боломжтой болж буй нь тус хөтөлбөрийн чухал үр дүнгийн нэг юм.