Pearson BTEC хөтөлбөрийг хэрэгжүүлж буй политехник коллежийн багш, арга зүйч нарт зориулсан чадавх бэхжүүлэх, арга зүйн дэмжлэг үзүүлэх сургалтыг 2025 оны 09 дүгээр сарын 11-нд зохион байгуулагдлаа. 

2025–2026 оны хичээлийн жилд олон улсад хүлээн зөвшөөрөгдсөн Pearson BTEC International IT Level 3 хөтөлбөрийг Монгол Улсад төрийн өмчийн 6, төрийн бус өмчийн 1, нийт 7 политехник коллеж хэрэгжүүлж байна.

Тус хөтөлбөрт:

• – 449 суралцагч үргэлжлүүлэн суралцаж,
• – 230 суралцагч шинээр элсэн орсноор
  нийт 679 суралцагч хамрагдаж байна.

Хөтөлбөрийн хэрэгжилтийг дэмжих хүрээнд политехник коллежийн мэдээллийн технологийн 30 гаруй багш, арга зүйч энэхүү сургалтад оролцож, мэргэжлийн ур чадвараа нэмэгдүүлж байна.

Сургалтын хүрээнд:

• – Pearson BTEC хөтөлбөрийн агуулга, арга зүй, үнэлгээний үйл явцыг зураглан тодорхойлох
• – 5 модулийг чадамжид суурилсан сургалтын хөтөлбөрийн загварт нийцүүлэн боловсруулах
• – Үнэлгээний аргачлал, төлөвлөгөө, даалгавар боловсруулах
• – Хэрэгжилтийн явцад тулгарч буй асуудлыг тодорхойлох,
• – Сайн туршлага, арга зүйгээ харилцан хуваалцах зэрэг чиглэлээр ажиллалаа. 

Pearson BTEC International IT Level 3 нь дэлхийн 71 улсын Засгийн газар, мэргэжлийн холбоод, ажил олгогч байгууллагууд болон 300 гаруй их, дээд сургуульд хүлээн зөвшөөрөгдсөн хөтөлбөр бөгөөд суралцагчид гадаад, дотоодын их, дээд сургуульд дэвшин суралцах, мэргэжлээрээ ажил хөдөлмөр эрхлэх өргөн боломжийг бүрдүүлдэг.

Монгол Улсад дараах мэргэжлийн болон техникийн боловсрол, сургалтын байгууллагууд Pearson BTEC International IT Level 3 хөтөлбөр хэрэгжүүлэх албан ёсны төвийн эрхтэй ажиллаж байна. Үүнд:

• – Үйлдвэрлэл Урлалын политехник коллеж
• – Техник технологийн политехник коллеж
• – ШУТИС-ийн Өмнөговь аймаг дахь Технологийн дээд сургуулийн харьяа политехник коллеж
• – ШУТИС-ийн харьяа Хөвсгөл аймаг дахь политехник коллеж
• – Ховд аймаг дахь “Хөгжил” политехник коллеж
• – Дорнод аймаг дахь политехник коллеж
• – Дархан-Уул аймаг дахь Дархан политехник коллеж

Өнөөдрийн байдлаар дэлхийн хэмжээнд Pearson BTEC хөтөлбөрийн 800 гаруй албан ёсны төв үйл ажиллагаа явуулж, мэргэжлийн боловсролын 15 салбарт 2000 гаруй мэргэжлээр сургалт зохион байгуулж байна. Тус хөтөлбөрөөр 1 сая гаруй суралцагч амжилттай төгсөөд байна.